好媽媽

今日喺大M奴食Lunch.
有一對母女坐喺隔鄰枱.
個亞媽食飯不忘學習. 突然問個女, 大M奴的宣傳句子"I'm loving it!"中文應該點譯.
個女答: 我就喜歡!(大M奴嘅標準翻譯)
然後,
個亞媽就作出咗以下一段嘅語文教授(大概啦, 邊有可能每粒字記得晒!):

咁就係唔啱啦. I'm loving it"有"ing"係現在進行式. 即係"我現在鍾意緊."
"我就喜歡"係將來式. 即係我依家都仲未鍾意. 遲D就會喇.
"就"字喺中文度係將來式.
"就去"即係去咗未丫? 係未去, 遲D先去.
D人中文真係差! 譯成咁都攞得出嚟.
記住呀個"就"未係將來式嚟架!

呢段中文教學聽到我忍唔住係咁擰頭. 幾乎衝口而出同個亞媽講: 唔好教壞個女啦. 師奶.
好媽媽, 你熱心教個女係好, 但係你忘記咗"就快"係只有香港人同熟悉"港式中文"嘅人至識用.
最常用同正確嘅"就"係"就是/ 就係"嘅意思. 並唔係D咩野"將來式". (當然仲有好多其他嘅配搭同用法)
所以, "我就喜歡!" 係: 我就係鍾意!

好媽媽, 如果你個女聽咗你嘅教導之後, 返學校同佢嘅中文教師講, "就"係將來式. 睇怕亞老師都會當堂hang機...

對處女的執著

無論翻開中外歷史, 不難找到的是, 不管哪個民族, 對"處女"都抱持著一些執著.
但對"處女"有最奇怪的執著的, 恐怕是社會風氣越來越開放的現在的香港.
為什麼是"最奇怪的執著"?
因為別的地方, 對"處女"的執著通常只會用在人的身上.
但在香港, 這種執著卻是用在食物之上的.
例如:
吃雞, 要吃"處女雞", 即從未下過蛋的"雞行".
吃鴿, 要吃"處女鴿", 即連眼都未開的乳鴿.
連吃三文魚, 也要吃"處女三文魚"!!

當前天我從巴士的上層往下望見放在"鵝頸橋"下, 某食肆的宣傳"易拉海報"時, 幾乎兩眼反白...

"處女三文魚"!!!

如果以"有冇進行過性行為"來劃分是否"處女"的話. 所有市場上在賣的三文魚都是"處女".
因為三文魚在河流上游出生, 逐漸長大, 游出大海.
2年後, "長大成人"了, 便會游回出生的河流生產下一代(這也能算是"性行為"吧...). 然後因為已將體內所有能量都消耗盡而在河的源頭等死.

在市場上賣的三文魚都是在海中捕捉, 而不是在河流上游撿的死屍. 生產過的"非處女"三文魚也根本不能吃(最起碼對人來說是如此).

雖然不知道有多少人慕名而去, 但以"處女三文魚"作招徠而又真的有人相信的話. 如果不想說那些人沒常識的話, 唯有是說他們對"處女"有不尋常的執著了...

今天. 灰黃天

因為台灣打風.

因為高壓脊影響.

因為懸浮粒子積聚.

因為好多好多不同的因素.

加在一起的結果.

就是又悶又焗的高溫和灰黃色的天空.

唔好執輸

香港人做野, 成日都係一窩蜂. 其實証監會話係"羊生羊太"都真係冇錯.
好多時都係"人做我又做, 唔知係為乜, 最緊要係唔好執輸!"

就好似早幾日銀行出"紀念鈔", 搞到人人都去瞓街瞓幾日. 雷暴雨之下都去瞓街嘅, 可能買到貨數少D嘅嗰D. 遲瞓街少少嗰D, 可能都只係得返"廿蚊"嗰種俾佢買.

1日之後, 熱烈氣氛已經完全消散. 亞爸今日去到銀行搞D例行公事. 有個銀行職員走過嚟, 問: 先生, 你係咪買紀念鈔呀? 嗰邊丫. 唔駛排隊.

因為唔駛排隊瞓街, 亞媽之前又話過想要, 於是, 亞爸就買咗兩張廿蚊返來.

以時序嚟計, 亞爸係慢咗. 但係以付出嘅程度嚟計, 瞓完街又只係買得廿蚊嘅人就付出咗好多.

呢個"輸"究竟係邊個"執"咗呢?

迷幻咩直

今日放工搭緊巴士返屋企.
突然發現天空出現十分之妖靘嘅"桃紅色咩直(Magic, D影相人用嚟形容好靚嘅日出日落時用嘅字)"
因為係傻瓜機, 再加上係喺架行緊嘅巴士上面,
所以,
影出嚟嘅咩直, 非常之迷幻...

錯覺...

呢個係某金飾店嘅廣告, 話: 愛 . 迷人 My Dear
我驟眼望, 竟然見到一對"孖葉"!!

幾乎嘔血!

“中國印”大型摩崖石刻。（來源：北京晚報）

呢一個, 就係為咗紀念中國舉辦奧運而整嘅"中國印"大型摩崖石刻.
喺電視新聞第一眼睇到佢時, 真係令我頭暈目眩, 呼吸困難.

雖然呢個山唔算得係"鬱鬱蒼蒼". 但係都唔可以夾硬幫人開闢一幅大禿頭, 再加一大灘血紅色落去架!
仲話要搞"綠色奧運"! 保護環境做唔到不特止, 仲主動砍伐林木, 破壞自然景觀. 真係唔知佢"綠色"咗去邊?!

為咗寫呢篇Blog, download咗張相落嚟. 望多兩眼之後, 越睇越覺佢似座山墳...
新曆8月即係農曆7月, 整座咁大嘅山墳嚟慶祝...啋!

一隻雀雀, 有兩個腳腳