變態貓殺手

近期這號人物(們)在香港引起了不少的輿論. 因為他殺死小動物的手段非常兇殘, 冷血, 變態.

報章電視大肆報導愛護動物人物力斥警方不肯認真辦案. 眾人眼光集中在"動物"之上, 背後的潛在危險則只是輕描淡寫, 帶過就算, 被忽視的程度可能比"動物"更嚴重.
不是說在街頭流浪, 朝不保夕的生命不需重視. 而是至這潛在危險於不顧的話, 將來可能會有更嚴重損失.

根據美國聯邦調查局(FBI)對連環兇殺案人犯的經歷和背景作出的調查顯示, 在這些冷血的變態殺人狂當中, 有大部分在真正"攪出人命"之前都有殘殺小動物的履歷.
報告指出, 他們會用小動物來作"練習", 當他們覺得自己已經擁有"熟練技巧"(有一些是因為殺小動物已不能滿足他們內心的渴望/對刺激的需求)的時候, 他們便會向"人"埋手.
他們通常文靜內向而且心思慎密. 犯案之後仍能表現得一派悠然自若. 令人覺得他是循規蹈矩, 絕對不會行差踏錯的一類. 以至當案件被揭發時, 從認識他的人口中通常會得到"怎麼猜也猜不到他會做出這樣的事."或者"絕對無可能是他做的."之類的反應.
這一類人, 十分危險.

所以, 要罵的不只警方對殺貓事件的態度和手法, 還要對他們的"欠缺危機感"多罵兩句.

有這樣的老闆, 感覺應該會很好...

(am730 27 Dec, 2007)

小甜甜

昨晚的日文課, 在教新一課的生字. 其中一個是"場（ば, 音ba）", 係"場所"的意思. 通常會有指示有關場所用途的詞放在前頭, 例如"遊び場(asobiba, 遊樂的場所)"、"交際場(kousaiba, 交際應酬的場所)"、"乗り場(noriba, 乘車乘船的場所)".
先生突然間陰陰咀笑住問, 有冇聽過"しゅらば(syuraba)". 因應她剛剛講完自己的廣東話發音不準確, 好易變成了在講粗口, 於是當聽到"しゅらば"時,突然間覺得個發音同廣東話的某句變音粗口好似...
但是她要講的原來是"修羅場".
"修羅"即是佛教當中的"阿修羅（あしゅら）". 有說他是"戰神", 有說他是"惡鬼". 我對佛教了解不深, 所以不知道究竟是那一個, 還是兩者皆是, 但在日本"阿修羅"就是會引起戰爭,混亂的一個神話中的人物. 而"修羅場"就是"大変な/混乱(こんらん)の場所(大件事/混亂的地方)"
和好多香港人一樣, 我第一次接觸"修羅場"這個詞是因為看日本漫畫. 漫畫家的家(或工作室)在截稿前都會變成"修羅場".
先生提起"修羅場"時之所以會"陰陰咀笑", 原來係因為她想起了她的年輕歲月.
年輕時的先生原來也當過漫畫家,也經歷過"修羅場". 但她說她並不出名, 所以她自己的"修羅場"不是十分"壯烈". 壯烈的"修羅場"是屬於五十嵐久美子先生(就是"小甜甜"的作者)的. 她們曾試過一星期不眠不休地趕稿, 最多只睡2小時... 好辛苦. 但她說: 沒辦法, 因為是好朋友叫到, 不幫不行.
但見她笑著說的模樣, 便覺得即使是"修羅場", 也可以是美好的回憶.

朋友的金句

今晚同一班舊同事一齊去咗其中一個人嘅屋企BBQ.
一班傻吓傻吓, 癲癲得得嘅人聚埋一齊, 自然就係乜都玩得一餐, 仲要隨時笑料百出.

當食糖水嘅時候, 屋主--酸乳酪就講
酸: 亞希呀, 你教我點煲丫. 下次我煲時, 你嚟監督住我丫.
希: 吓? 不如你嚟我屋企, 我教你煲啦.
酸: 你屋企咁遠, 坐車都坐到我暈船浪呀.

因為佢講得實在太順口, 實在太理所當然到我要幾秒鐘之後先發現, 佢坐車, 原來係可以坐到暈"船"浪嘅! 當堂笑到企唔穩...

繼續玩, 繼續食. 食到個胃脹卜卜, 大笑嘅時候特別辛苦. 喺呢個又辛苦但係又要笑嘅時間, 酸乳酪又整咗句
酸: 笑到我D胸肌好肚痛.

原本已經開始收歛嘅笑聲又再爆發!
我笑到連背肌都痛埋...好辛苦... ***^@^***

星期六

返到公司, 望見平時都燈光火著嘅附近單位, 今日都烏燈黑火, 突然覺得好唏噓.

其實, 我一直都唔明點解d公司要人星期六返半晝. 因為實在係無生產力嘅幾個鐘. d人返到公司, 玩嘅玩, "hea"嘅"hea", 發吽哣嘅繼續發吽哣. 根本無幾多野做到出嚟, 但係消耗就好多: 水(蒸餾水, 如果有私家廁所就仲有洗手嘅"食水"),電,煤, 附加職員因為要晨早起身返半日工而出現無法消除嘅"怨氣".

如果星期六唔開工, 除咗可以慳咁d錢之外, 仲可以mark大喉嚨話係益咗d職員. 因為返少咗半日等如每個返工日嘅人工都多咗, 即係"變相加人工". d職員自然一至五開ot都開得順氣d.

老闆無實際損失, d職員又開開心心, 真係何樂而不為!

...好想返5 day work....

妹妹 - 04

妹妹小時候

妹妹 - 03

妹妹 - 02

妹妹 - 01

同學的小狗.

十分可愛+非常聰明.

聞說她的"請請"是自學的! 但什麼東西都是"波波"...

茶道

今日放工之後到了茶具博物館看日本茶道示範.

這次活動是由康文署, 日本文化協會及裏千家淡交香港協會合辦.

主持人在簡單介紹了日本茶道茶會的模式之後, 穿著和服的一班協力便給參觀的我們送上和菓子(主持人叫我們在喝茶前先將和菓子吃掉).

而同一時間, 負責煮茶的"主人"(粉紅色和服)便開始示範. 黃色和服的是負責將茶送給"主客人"的"助手.

準備將抹茶粉放進茶碗

以"六點"和"十二點"的方向, 用茶刷把茶打成泡沫

茶道老師(男)講解喝茶的方法:

1, 接過茶碗之後先順時針轉2次, 將茶碗的正面轉向外

2, 將茶分"3口半"喝完(我猜是3大口+1小口, 所以是"3口半"吧...)

3, 用右手的拇指和食指將"唇印"抹掉, 再用塾著和菓子"的"懷紙"抹手.

4, 將茶碗逆時針轉2次, 欣賞一下茶碗.

5, 將茶碗交回主人

協力們將茶送給我們.

喝完茶後, "主人"會即席清潔茶具. (按照正式的茶會規矩, "主人"會一直不斷煮茶, 直到"主客人"說喝夠為止.)

因為參觀示範的人數眾多, "主人"只負責"主客人(2位外籍人士)"的茶. 我們喝的, 就是在後台的這群協力煮的.

屏風上的捲軸寫的是"和敬清寂", 是茶道的精神. 放在枱上的是(右至左)燒熱水的"鐵鍋", 擱熱水勺的"鍋蓋座"和放茶粉的"茶罐".

放清潔茶具用水的"冷水瓶"

布景之一的陽傘上綁了一些代表秋天的菊花. 藍色和服的是主持人.

一直以來都知道"甜得想哭"的和菓子是配很苦的抹茶吃的. 但從來沒想過原來他們真的是天生一對. 和菓子的甜味被抹茶的苦味中和之後, 在口中只剩下淡淡的茶香. 感覺很舒服.

茶會完結之後跟主持人要了せんせい的電話, 有機會也要去學一下.

原來真有其事

冇工返嗰段時間, 成日跟亞媽去同班街坊亞姨飲茶(順便當食晏).

有一日有個亞姨講起佢個女成日著D衫V領開得好低, 好易走光, 話反屋企要鬧吓佢.
於是一班亞媽就你一句我一句, 開始講依家流行嘅服裝款式.

"我以前做野嗰度有D女人著D褲低到連'屎坑'都睇埋!" 亞媽咁講.
然後有個亞姨答:" '屎坑"之嘛! 低到連毛都露埋嗰D我都見過呀!"

當時我以為只係嗰個亞姨比較誇張, 點知...

今日放工搭地鐵, 入到車廂, 人多, 唔好對人"眼啤啤", 所以就DUP低頭.
咁啱得咁橋望到企對面嗰個女士露咗喺衫腳同褲頭之間嗰截肚皮, 然後望到褲頭之上有D野露咗出嚟...

啋!
原來嗰個亞姨講嘅係真有其事嘅...

形象 (三)

每次去到公共更衣室(GYM的也好, 泳池/海灘的也好)總覺得大開眼界, 蔚為奇觀.
在更衣室之內, 因為全都是同性, 當然就有好多人毫不介意, 大剌剌地光脫脫或只穿著內衣褲四維走.
無論有穿還是沒穿, 其實也不是什麼好驚奇的事.
讓我覺得不可思議的, 是某些人所選的內衣.
身為一個女人, 內衣除了要選穿得舒服的, 還要是合身的, 好看的.
眼見有一些女人穿在身上的內衣, 布料明顯地已因為穿久了而沒有了彈性, 但仍然像細了一個碼, 擠出了內衣之外的肥肉搖呀盪呀的, 實在是看傻了眼.
不合身的內衣除了穿起來不舒服, 穿久了還會令身材變形, 變得越來越難看. 把自己"扎"成了米芝蓮車胎人一樣一節一節的身材!
在一副"畸形"了的身材外面, 就算是穿上名師的設計也不可能有好看的模樣. 這也是破壞形象.
所以, 小心選擇是很重要的!

奇異的聯想

星期六朝早, 喺快餐店食早餐.
有火腿, 腸仔, 煎蛋再加多碗米粉.
中西合璧嘅港式早餐. 但係餐具只有刀叉, 無筷子.
食米粉時唯有用叉.
攞住支叉, 喺D米粉度叉咗幾吓, 突然間諗起細個去金魚檔買紅蟲餵金魚時, 個老闆娘將D紅蟲叉落個膠袋仔度時都係咁嘅手勢...
好在D米粉唔係紅色... +__+;

今天的黃昏

今日放工喺地鐵站口影嘅.

我自己就覺得好靚喇! 如果間清真寺無咗D棚架就仲正!!

同學話影到唔似喺香港.

你地覺得呢?

信不信由你

失業了幾個月.

亞媽非常之擔心. 於是帶我去了黃大仙祠求籤, 以"求大仙指引".

結果求"事業"的籤是"下下籤".
解籤的大叔說, 這"下下籤"是指我事業運差. 因為失業, 事業運當然是差了.
大叔接著說, 按籤文解釋, 只要過了"掃墓的月份"亦即是農曆9月(重陽掃墓...)運情就會轉好. 亦即是可以找到工作.

2星期過後,

明天, 是我到新公司工作的第一天.

是農曆的十月三日.

法則18

今日返學之前冇野做, 去咗圖書館睇書.
搵到一本叫做 "找這樣的公司就對了! (時報出版/ 藤野英人著)"嘅書.
呢本書係作者按據佢多年來走訪過好多日本大小企業之後綜合出嚟嘅成果. 呢本書列咗六十幾條法則出嚟俾大家(當你打算投資或者轉工時)參考, 從邊D地方可以分別出"好or有前景嘅公司or老闆"/ "壞or冇前景嘅公司or老闆". (當然唔係所有法則都啱香港用.)
當中嘅"法則18", 令我喺必需安靜嘅圖書館幾乎笑出嚟!

法則18: 身擁高級進口座車的老闆, 你要質疑其經營能力

內容係講藤野先生曾經先後去過2間同種工業嘅公司/廠房. 第一個嘅廠門口停咗幾架高級進口車(唔係用嚟載客, 因為藤野先生要自己搭車去), 幾個司機無事忙, 喺度用雞毛掃抹車. 入到廠房, 裡面D器材機械又殘又舊. 之後呢間公司嘅股價大瀉.
另一間, 老闆親自揸架用到已經變咗中古車嘅客貨兩用車出車站接藤野先生. 但係佢廠房入面果D全部都係最新型嘅機械. 呢間公司憑藉佢老闆識將D錢用喺該用嘅地方(即係唔會用公家錢買玩具俾自己玩), 同肯努力做研究(佢喺自己屋企整咗間研究房, 放工返到屋企繼續研究!!), 於是攞到好大嘅市場佔有率.

齋睇呢D內容, 好難會明點解我會笑.
但係如果你係我嘅舊同事, 我相信你都會凈係睇到個法則標題就會想笑.

紙花

有一日喺書局見到一本教人用圖案打孔機打出嚟D"紙碎"整紙花, 睇咗幾頁.

咁啱亞妮斯結婚時佢買咗幾個呢D打孔機, 於是就試整咗幾棵嚟玩.

形象(二)

今日跟亞媽說及友人在國內土產店遇到的事. 她笑說她碰到過的那件事可能可以解釋"為何那位國內人女士會當眾整理內褲".

某日, 亞媽去到某大日式百貨公司的金飾店選購飾物. 有一位大約三四十歲的國內人男士坐在亞媽旁邊. 當時那位男士已決定了購買哪些貨品. 在店員告訴他總金額之後, 他突然解開腰上的皮帶, 拉下褲鏈, 將手伸進褲襠裡掏!

那店員被嚇得目瞪口呆, 結果他從褲襠裡掏出來的, 竟是一個巴掌大小的布袋. 他打開布袋, 再從裡頭掏出一個更小的袋子, 而後在小袋子中取出一疊鈔票. 付款之後他便將他的錢包再一次收進褲襠裡. 全程都表得理所當然. 只有目睹全程的店員和亞媽在心裡暗自大驚小怪.

所以友人在土產店遇見的那位女士可能不是要整理內褲, 而是準備從錢包中取錢購物!

天啊!

這到底是一種怎樣的民族習性??!!

形象

國家需要形象.

公司需要形象.

個人本身亦需要形象.

其實形象這東西並不一定要找個"形象顧問"來攪, 只要自己多注意一下就可以.
我之所以會這樣說, 原因是, 我所說的形象並不是那些目的是令人印象深刻, 一見難忘或眼前一亮那些"專業形象", 而是簡單地讓其他人覺得你得體, 不會失禮的"普遍形象".

為什麼會突然說起"形象"? 因為前天和剛從國內旅遊回來的友人吃飯時, 聽她說了一宗令我覺得絕對是有損國體的事情.
話說旅程中的一站是當地的土產店. 店內人頭湧湧, 十分熱鬧. 但有一位國內人女士竟然就在如此的眾目睽睽之下, 拉高她的長裙, 氣定神閒地整理內褲!!
友人問:這是因為國內對性開放了的關係嗎?
我答:這不是性開放不開放的問題而是禮儀的問題. 試問美國,法國等國對性不開放嗎? 難道她們滿街的女士都會當眾整理內褲的嗎?
這樣的事情看在外國人眼裡, 不是有失國體, 損害國家形象是什麼(我幹嗎突然這麼愛國??)?

國家需要顧全國家形象, 公司也要維護公司的形象.
在站滿一街都是業務推廣的現在, 一家公司的形象有很大的程度是依賴這些推廣員去建立的. 也就是說當一個業務推廣員身穿制服, 在街上招攬生意時, 他/她的言行舉止對所代表的公司會有深遠的影響.
試想一下當你在街上時見到一個用免提話筒高談闊論, 粗口橫飛的業務推廣員時, 你有多想給他/她生意呢? 你覺得他/她所屬的公司又是一間什麼程度的公司呢?

最後說到了個人.
一個人即使不需要以個人的形象魅力以招來利益也應該注意自己的形象. 例如一大早就已經滿身"宿"臭汗味的男人, 一邊走在街上一邊叼著牙籤在嚼的女人. 這雖然對他/她本身(或其他人)沒有多大的影響. 但說實在的, 在街上碰到這類人, 也真的是會想要跟他/她們保持距離.

所以說, 好的形象其實不一定要靠光鮮亮麗的名牌服裝, 只要多多注意一下自己的行為習慣就已經可以了.

Taking Lives

這套電影的中文譯名是"屍人交易".
碟是買了很久(也是找了很久才買得到), 但一直只是放著.

今天終於看了.
不是太過驚慄, 也不算是十分驚心動魄("60秒優先場"的影評竟然是:"絕對驚心動魄, 令你不敢正視銀幕! " 我猜寫這影評的人應該是只看愛情片的...), 連劇情也猜到了不少.
但導演的表現手法不錯, 而安祖蓮娜祖莉的演技也很讚.
不過, 為什麼安祖蓮娜祖莉3點差不多都全露了, 這套電影還只是2B級呢?

傳統, 經已改變?

尋晚, 萬聖節.
正'忘我地'溫書之際(因為今晚測驗啦), 突然門鐘響.
心諗"夜媽媽邊個呀?"
打開門一睇, 原來係3隻小鬼.
尋晚總共嚟咗7,8隻小鬼. 個個拎住個D糖已經放到差不多滿瀉嘅袋.
有趣嘅係, 全部小鬼都係女仔. 雖然聽到D男仔聲由樓下公園仔傳上嚟, 但係佢地無上樓(最起碼冇嚟拍我門).
而嗰班上樓嘅小鬼竟然冇一個記得要講:trick-or-treat?
只係識講:Happy Halloween!
究竟係因為佢地係女仔所以斯文D, 唔會'威脅人'?
定係因為傳統已經改變呢?

夢裡的歌聲

我成日發埋d夢d內容都係好古靈精怪. 除咗呢個blog嘅第3篇講過嗰個, 仲有: "跟蹤"一個攞住槍, 亂槍掃射當中嘅人, 灰紫色月球撞地球, 超級大海嘯, UFO襲地球(呢個夢竟然係全程講日文, 我仲要聽得明!!)
除咗呢d, 我發現我成日都會喺夢裡面聽到一d我從來未聽過嘅歌.
喺夢裡面d歌好清晰, 連每粒歌詞都聽得好清楚. 臨醒嘅時候仲會記得旋律同歌詞, 但係到清醒嘅時候就完全唔記得晒...
試過有一次, 隱隱約約記得起幾粒音, 走去問個鍾意聽歌嘅friend. 佢話未聽過. 仲問我係咪諗住作曲...
我個腦, 究竟係裝乜嘅呢?

All Hallow's Eve

自己本身冇宗教信仰, 本應對宗教事務多多收聲. 但係有時又真係頂住道氣...
早兩日喺某免費報紙睇到有半版咁大, 由d教會人士寫關於萬聖節嘅由來種種嘅文章. 其中話中國人好離譜地將異教徒嘅鬼節翻譯成"萬聖節", 仲要歡天喜地, "大肆慶祝". 實在係助長魔鬼腐蝕人心. 十分邪惡.
但係, 如果有人問我邊個節日最邪惡, 我諗我會答係聖誕節. 因為歌仔都有得唱:"平安夜, 失身夜."
呢個在我眼中最邪惡嘅節日, 偏偏就係呢d叫人要小心魔鬼, 唔好做異教徒做嘅事嘅教會最重視嘅節日之一.
其實佢地要點睇每個節日嘅"好與壞"同我完全冇關係. 我之所以覺得頂住道氣, 係因為呢班人一邊叫人唔好慶祝異教徒嘅節日嘅同時, 自己亦隆重其事地慶祝異教徒嘅節日.
"慶祝耶穌生日"嘅12月25日, 本來唔係耶穌嘅生日(根據歷史學家同天文學家按照聖經所寫而作出嘅研究, 耶穌係喺夏天出世嘅). 而係古羅馬(?)人-異教徒-祟拜太陽嘅日子. 全因"突然信主"嘅君士旦丁大帝嘅命令, 呢個異教徒嘅節日就變咗教徒嘅節日!
呢d咁嘅人, 仲叫人信佢?
嚡~
發洩完喇!
算吧啦!
莫講我只係喺個blog度自言自語, 就算兜口兜面講, 佢地一樣可以搬好多"道理"出嚟耍. 反正無論係政客, 權威, 有勢力人士同高層, 都只係會講佢要你聽嗰套. "不同嘅聲音"只係會被風吹散咗...

夏諾特小姐

完成了!

亞媽睇到時問: 點解著綠色裙?

因為"夏諾特"係綠色(邊個話我知嘅呢?), 所以"夏諾特小姐"要著綠色嘅裙.

第一次整人形, 自己覺得已經係唔錯. 但係因為手多, 所以令到夏諾特小姐有塊"胎記"喺左邊面. 唔開心...

鷹

在家的附近有很多鷹.

其實不知道牠們是不是"鷹". 只知道牠們是猛禽, 所以就自把自為, 叫牠們"鷹".

我好喜歡"鷹". 牠們強壯, 美麗, 自由.

有時候會羨慕鷹. 因為覺得牠們的生活很簡單, 沒有複雜的人際關係, 沒有規定的上班時間, 也沒有定時定候必需要交的各樣生活雜費.

而且, 因為牠們是猛禽, 只要能夠"長大成人"就已經沒有其他東西能威脅得到牠.

多好.

但是,

牠們有否也曾覺得大地不夠廣闊, 天空不夠高呢?

還欠上色

還欠上色, 夏諾特小姐就可以完成了!

Break the rules

唔記得喺邊度聽/睇過, "規矩係因為要俾人破壞而存在."呢句說話.

好理直氣壯!

雖然唔係每個人都好似佢咁. 但破壞規矩嘅人確實唔少. 最普通嘅係"不遵守交通規例"和"隨地拋垃圾".

呢d都係政府的"規矩". 私人屋宛的"規矩"又如何?

我同亞爸亞媽每晚都會去散步嘅海濱長廊, 四維都鑲咗鋼板, 叫人唔好踩單車, 唔好食煙, 唔好釣魚.

現實係, 每晚都有唔少"未來黃金寶"喺度練車, 當然地有唔少"座埋一邊"吹水嘅人食煙, 同埋更加多嘅魚鉤同魚絲.

今晚隨便數一數700米長嘅路就已經有46套魚杆+魚絲牌正在"開工"(魚絲無放落海嘅冇計, 啱啱走嘅一團十幾人親子釣魚團亦冇計到). 場面實在偉大!

政府要發展南區, 不妨考慮開返個釣魚場. 但係到時冇咗呢條"不准垂釣"嘅規矩可以破壞嘅時候, 仲有無咁多人釣呢?

兒歌

曾經有個男藝人講過"唔明點解d幼稚園生唱'賣花的小女孩'時都係好開心? 隻歌其實好慘."
諗清楚, 其實唔只呢一隻. 幼稚園歌(唔知依家d係點, 最起碼我個時代嗰d係)好多都係內容好慘.
好似"亞積同亞珍拎住水桶仆親由山上面碌落去", "親愛的老農人屋企俾人爆格", 甚至"有隻雀仔跌落水被水沖去". 內容都係衰野嚟, 但係d Miss就教到d細路個個都拍晒手, 好開心咁唱.
諗真, 都幾扭曲吓...

GBA

"GBA" 忠僕號. 只係比鐵達尼後生少少. 已經係個好老嘅忠僕. 所以就快要退休Lu...

中環海魚養殖場

這個就是在中環海灘旁的"中環海魚養殖場".

八月十五行海旁

人好多. 好驚(我有"人多恐懼症")

行咗一陣, 影咗d相就走...

維園彩燈會 2007

http://picasaweb.google.com/hay.wada/2007

要說嘛, 不夠去年好...

中環海灘

知道這是哪裡嗎?

沒錯!這裡就是政府斥資數百萬,在維多利亞港興建的人工泳灘 -- 中環海灘!

這個泳灘交通方便, 旺中帶靜, 而且附近的配套設施非常完善.實在係一個十分優質的民娛康樂場所.

不過, 政府同時呼籲, 以下時間不適宜到海灘游泳, 包括: 天光, 黃昏(因為係鯊魚的捕食時間), 猛太陽的時候(容易中暑及引致皮膚癌), 晚黑(救生員放工回家了)和海水混濁的時候.

所以, 還是省省回家睡覺吧!

終身伴侶

有人話過:"搵工如同搵老公 "
的而且確, 人一世大大話話有成40年要返工. 揀唔啱就真係被死更難受.

"因了解而分開"唔單只係對人, 對工作都一樣.
思前想後, 還是撇脫一點比較好.

亞爸的漁獲

我亞爸鍾意釣魚. 一放假就會同幾個friend一齊去釣魚. 有時喺岸邊, 有時租艇仔出海.

今日佢釣咗條咁樣嘅魚返嚟.


查過書(我屋企有本"附近海域常見魚類圖冊"), 呢條魚叫做"飛機魚", 又叫"角鬚紋". 屬飛角魚科.
本書仲講呢種魚豐度(即係數量)低, 可以長到40cm. 亞爸呢條都差不多有30幾40cm長!!!

情況惡劣

今天一早新聞就說因為什麼"反氣旋"的關係, 會有"煙霞".
到了下午, 天文台公佈:"一般及路邊空氣污染指數"達到"甚高"的程度. 呼籲有心臟病, 呼吸系統毛病及長期病患者避免進行戶外活動.

住在一向以空氣好見稱的南區的我, 晚上和亞爸亞媽走到家附近的海旁, 進行每晚的例行散步.
怎知一下了樓就覺得很不對頭. 2, 3百米外的東西也是模糊的! 空氣差得我不斷咳嗽, 呼吸困難!
平日我們會散步1個小時, 結果今天10分鐘不夠我便"扯白旗", 投降了...

土用の丑の日

(『needs』 Vol.002 2007 Sep)

還記得7月中開始, 在東京很多食店都在門前掛著"土用の丑の日、鰻丼！"之類的宣傳. 當時不知道這個"土用の丑の日"是何哪日, 也不知道和鰻魚有什麼關係.
直到7月30日吃晚飯(就是鰻丼!)時忍不住問了お母さん(宿舍媽). 她說因為日本人認為夏天吃鰻魚會開心,健康身體好. 叫我哋都要食多點.
老實講, 我不喜歡鰻魚, 覺得好腥... 那晚的蒲燒鰻魚也分了一半給同學...+___+

今日(三) -- 貪一時之快, 可能損失更大

呢張相係返屋企途中影嘅.

照睇現場情況就係後面嘅貨車喺"不符合交通規則嘅情況下雙白線爬頭", 然後撞到前面架"皇冠速遞"

貪一時之快, 結果損失更多嘅時間同金錢(仲會被扣分, 甚至被人告).

累人累己. 為乜丫?

今日(二) -- 美白美女

近幾年個太陽越來越"毒". 一眾美女為防晒黑, 只要一到戶外都會撐返把"太陽傘".
一般人會在"無瓦遮頭"的地方撐.
但今日我遇到2位"美女"竟然喺長逾1,000米嘅有蓋行人天橋(無錯, 就係去搭渡輪果條天橋)撐傘!!
莫非在"天蓋"之下撐多把傘會更加"美白"??

今日(一) -- 見證盛事

今日朝早返公司途中(又係搭渡輪), 喺行人天橋見到好多人攞住相機"頭岳岳", 諗咗一吓, 醒起佢地原來係嚟影"空中巨無霸低空飛越維港".
我望吓表, 時間好鬆動(當然, 因為我預計埋食早餐嘅時間), 所以就跟其他人一齊"攞住相機頭岳岳".

以下就係我的"非官方第一手相片"
嚟緊喇!
真係好大架!!
睇清楚d, 係A380!!
飛走lu...

高踭鞋

新工作需要穿高踭鞋.
不太高, 只有大約1寸.
穿了2日.
結果:
1對腳
2個腳踭
10隻腳指
+
13個水泡
附加
1個肌肉酸痛的背....

"高踭鞋"這種東西究竟是誰設計出來虐待女人的?

天氣晴朗, 但空氣污濁

今天一早到新的公司辦理入職手續.
選擇了乘渡輪"上班". 在途中拍下了這一幅照片.
天氣晴朗, 藍天白雲. 應該是賞心悅目. 不過, 有否發現浮在海面上的一層"薄霧"?

灰灰的.

那些不是"薄霧"而是由被稱為"懸浮粒子"的污染物質聚積而成的"毒霧".

晚上新聞佈道了巴士公司會購買新型號引擎的巴士以減少污染物排放量. 這是一個好消息.
希望類似的好消息可以陸續有來.
希望能有更多真正的藍天白雲, 加上空氣清新.

是冒險? 還是挑戰?

從正式加入"失業大軍"到現在快滿3個月. 因為7月會整個月去日本短期留學, 所以6月都沒有搵工. 總不能6月見工(如果請的話), 8月才上工! 大部分公司是一個月也不等, 何況2個月?

雖然正式開始搵工只有3星期, 但得朋友介紹下, 更深一層地認識了保險及財務策劃的工作, 決定去試一試.

這份工, 家人不睇好, 朋友有點"聞風色變", 自己也沒有太大的信心. 但是仍然決定去做, 是不是個冒險的行動?

但是, 如果再在之前的行業中找份工, 安份守己的"做生不如做熟", 又會有些什麼前景呢? 轉一間新的公司, 等待下一次的"北上遣散", 亦或是"因回收賠償而導致的倒閉遣散"呢?

那麼, 轉行又如何? 轉哪一行不需要"從頭來過", 由新人做起? 轉哪一行有百份之一百的肯定是適合自己呢? 結果也是沒有.

記得7月尾仍在日本的時候, 因為拍不到富士山而對自己說過:"遇到機會便不要放過, 否則會後悔." 既然機會已擺在眼前, 為什麼不去試一試, 拼一拼? 試過之後要是失敗了, 大不了就是另一個"從頭來過".

2003年柬埔寨之旅

最近笨士爹娜去了柬埔寨旅行. 看過她的照片之後想起自己03年時去柬國的照片都還未放上網. 於是開始動工製作照片簿了.

翻看照片, 當時頂著一顆啡頭的我, 難怪又被人誤認是日本人...

http://haywdfcambodia2003.blogspot.com/

這是給收到手巾的女朋友們的

因為這手巾都算大, 所以自己加多條繩就可以用嚟整個手袋仔.

學緊日文的, 睇日文.

唔識日文的, 按以下步驟(當然要參照附圖啦..).

1, 將手巾面向上對摺成三角形

2, (最長邊向下)在距離頂角1/3位置用線將手巾縫合

3, 將手巾內外翻轉. 然後仍然見到底的一面向外, 將手巾對摺.

4, 在上方預留1.5cm的距離, 將左右兩側縫合.

5, 將上方三角形的部份向下摺, 在1.5cm的位置縫線做成一條可以穿繩的管道(分開兩邊, 唔好將個袋口都封咗呀!).

6, 將繩穿好後, 手袋仔大功告成!!

剛剛開始

最近除咗搵工, 寫小說之外, 剛剛開始整呢個.











佢係"夏諾特小姐".

唔知點解, 就係覺得佢係要叫做"夏諾特小姐".

改了

由於我的網頁不知何故, 好似中咗毒, 所以, 又setup咗另一個blog放今次短期留學嘅野. 逐少upload緊...

http://haywdfjapo7.blogspot.com/

超速完成

相同"遊記"都已經處理好!

由此路進
http://hk.geocities.com/haywdf/


相都是已經壓縮過的. 假如有誰想要"原汁原味的", 請私下給我一個貓.

我回來了

開始收拾東西和整理相片. 又影了近千幅...

等我.

要花d時間...

因為實在太多

好多相都有野想講

還有我的"遊記"

明天

很快的, 一個月了. 明天就回家了.
遇到了很多, 學到了很多.
雖然, 坦白地說, 日文的進步沒有多少, 但這次的短期留學仍然是個難得的經驗.

明天,
要回家了.

一個人在途上

早幾天日本打大風, 雖然吹不到東京, 但是電視新聞不斷的說, 這颱風怎厲害, 讓我們出去玩的計劃都打消了...
一個人"困"在宿舍房間幾天(那幾天咳得好辛苦, 話也說不了...), 好悶...

前天大地震, 雖然也不關東京事(去新潟的行程取消了), 但感受過搖足幾十秒的餘震之後, 說一點也不怕, 是騙人的.

一個月的旅程已過了一半, 昨天有同學問我, 覺得有什麼得著. 我當時沒有答她. 但還是覺得

在家最好.

我在日本的日子...

終於可以上網了!
宿舍上唔到網!!! 學校只有4部機...應該會有好多人爭(今日考分班試[好深, 好難, 好多唔識...]未開學, d人已經走晒去玩, 我遲d都去, 池袋買浴衣 ^@^)
因為無乜幾何可以用電腦, 所以應該都無乜機會可以update個blog...
等我...7月31日夜機返來...
***>___<***

7月1日慶回歸

今朝一早(其實唔算係好早, 10點零)亞妮斯打電話嚟叫醒我同亞媽睇佢同輝哥上電視. 原來佢地唔知點解(join咗電單車隊??)走去參加慶回歸車隊巡遊.
等咗個幾鐘卒之見到佢地喺個螢光幕嘅一邊"閃"過, 大半個螢光幕都係影住毛記果兩個做咗好多年都無人記得佢地係邊個嘅藝員. 亞媽因為閤著咗, 連果一"閃"都睇唔到...

夜晚放煙花, 我走咗去煮飯(用上次4妹用剩嘅Sake煮大蜆, 好美味!! :9~~)無睇到. 亞爸亞媽都話睇唔到有"中国人".

然後, 我發現一樣好奇怪嘅野, 就係點解香港每次放煙花, 都要播由台灣人作曲填詞, 台灣群星(勉強嚟計有一個周華健可以當係香港人)主唱嘅"東方之珠"嘅呢? 其實, 我由10幾年前第一次聽到呢隻歌時就覺得好奇怪, 你班台灣人做乜要"唱香港"呢? 定係呢首歌入面嘅"東方之珠"唔係指香港, 只不過我地呢d香港人一聽到呢4個字就將佢認定係指香港呢?

就快出發

依家心情唔係幾好, 專登買嚟去日本用果部PPC phone (唔係壞咗, 大吉利是!!)係果枝原裝筆仔, 啱啱跌咗落我床邊果條又窄又深嘅罅度...用盡辦法都整唔返佢上嚟.
好想拆咗張床...

仲有幾個鐘頭我就飛, 另外幾個剛剛"逃"咗出嚟嘅"新生會"會員亦都係呢幾日飛, 去玩一玩, 返嚟再搵工.

有2個已經搵到嘅亦已經遞咗信. 未搵到而遞咗信嘅都有1個.

全部都係向新嘅工作(人生??)"就快出發".

數一吓, 由舊年11月到依家, 由我舊公司"出發"咗嘅人有幾多個呢? 如果我無數錯, 就有18個!

成績唔錯!

應該係偏見

最近亞記夜晚播"雪山飛狐". 已經10幾年無睇中文電視劇嘅我都睇咗兩眼(因為亞爸係武俠小說迷, 陪佢睇吓...)
話係睇咗兩眼, 但係我果"兩眼"只係睇到連"開場白"都未講嘅時候. 因為亞朱小姐唱主題曲嘅美妙歌聲聽到我連塊面都起雞皮... *O*(每次聽到都起...)
我覺得好奇怪, 點解播錄音都可以走音嘅呢? 我通常係聽到d人唱live走音先會起雞皮. 播電視劇之前嘅片頭曲無可能係live, 所以應該係唔會有走音嘅出現. 不過, 點解...?
過咗幾日, 又係播呢套電視劇嘅時候, 我聽到朱小姐講對白時, 竟然都走音(得佢一個走音, 所以唔係我部電視有問題)! 無可能架! 一個演員講對白走音點可以收貨?
於是我相信, 呢d應該係偏見...

p.s. 亞譚生d演技...我唔敢講佢嘅表情動態舉手投足表現如何, 因為我只係"聽"電視. 我嘅聽覺話我知, 亞譚生只係對稿讀緊對白, 而且仲要用錯時代語調. 佢似喺大排檔同人講緊數多d. 果種語氣同講野方法, 真係令我覺得就算聽到佢講"帶返個腦啦死蠢! 你咁x蠢點跟人出嚟行呀!"之類嘅對白都唔會覺得出奇... 閤埋眼試吓丫搵日 :)

...以上所講嘅野, 可能全部都係偏見...

我諗我真係一個鍾意攪事嘅人

早兩日, 我又俾亞爸亞媽叫我唔好攪事.
今次嘅原因係, 我想寫封email去聯合國, 問佢地點解聯合國個中文網頁會無繁體中文(我自己覺得應該係叫"正體中文"先正確!)版? 聯合國係唔係想謀殺呢種已經有幾千年歷史嘅古老文字? 點解聯合國一邊叫人要保護人文遺產(挽救消失中嘅地方語言)嘅同時, 又要用果d無頭無尾, 斷手斷腳嘅簡化字去取代正體嘅中文字呢?(連聯合國都唔用, 仲邊會有其他人用?)
現在普遍使用正體中文嘅地方只有香港同台灣. 香港人因為要同國內人接軌, 用簡化字嘅時間越來越多(好似連中學會考都可以用簡化字答而唔會被扣分...) 以呢個速度走落去, 3代人之後, 世界上仍然識用正體中文字嘅可能只剩低"永遠係中國不可分割嘅一部分"嘅台灣人.
聯合國係唔係要到果個時候先會去"挽救消失中嘅正體中文字"呢?

今日(三) -- 賤人

夜晚, 去咗快餐店食飯. 我同亞爸亞媽3個人叫咗2個套餐. 剛好夠食冇浪費.
隔鄰枱, 一個男人帶住2個已經有10鬆d歲嘅仔女同一個外傭. 叫咗3個套餐, 最初諗住可能因為d套餐份量都唔細, share嚟食啱啱好(我地自己就係.) 但係睇落去就開始奇怪, 點解得個男人自己同2個仔女攞起刀叉筷子, 各有各食自己個套餐嘅呢? 個外傭呢?
佢食嘅竟然係果2隻細路食剩果d!!!!
有無攪錯!! 點解有人可以賤格得咁緊要?! 一個套餐值得幾多錢啫? 竟然要人食d細路食剩嘅野?! 人地係出緊你糧, 打緊你工, 但係人地依然係個人. 俾返d對人應有嘅對待好唔好?
你出糧俾人就大晒咩? 如果你打份工, 你老細要你食佢個仔食剩果d野你會點丫? 包保幾精彩罕有嘅粗口你都講得出!
將心比己啦. 唔該!

今日(二) -- 博物館

香港嘅博物館有好多間. 所以有好多不同類型, 本土嘅或者來自其他地方嘅展品會展出.
香港人亦都越來越多去博物館睇展覽. 仲要拖男帶女, 扶老攜幼.
我並唔係要反對一家大細一齊去睇(我都會同埋亞爸亞媽去, 仲會充當佢地嘅"私人導賞員") 但係當d細路當展覽廳係遊樂場, 你追我逐, 打打鬧鬧, 嘈到拆天時, 真係會好火滾!(我遇過一班小學生喺"秦甬"嘅展館入面玩定向追蹤, 今日係有幾隻喺"三星堆"開武林大會!!!)
再加埋有d"上一輩, 其實望落去佢地應該得四十幾..."望住d木乃伊, 棺槨(我自己偏愛睇歷史文物展, 睇埋嘅都係d"死人野")啋聲四起時, 好想扯巴佢歎吓!!
試想一下, 當你去睇古文物展, 個展館門口仲要棟住個"喪葬"嘅牌時, 你認為裡面嘅展品會係d咩呢?
我竟然就係試過喺d咁嘅情況之下, 聽到個"上一輩"講:"嘩! 有無攪錯呀! 放副棺材喺度!" 佢嘅聲量, 我可以話你聽, 係一d都唔細. 因為我當時係塞住earphone.
一家大細, 扶老攜幼去睇展覽唔係唔好, 但係, 可唔可以管教吓d小魔怪同帶返個腦先好去呢?

今日(一) -- 望夫石

好細個嘅時候就已經聽過"望夫石"嘅故事. 每次入沙田望到企喺山頂嘅果舊大石嘅時候, 都不奇然覺得心寒. 一個女人揹住個仔, 等老公等到變咗舊石. 人會變成石頭, 幾恐怖!! 我成日都覺得果度會鬧鬼. 因為我真係以為舊石係人變嘅...蠢! 完全無諗過, 點會有咁高大嘅人...直到亞媽講我知果兩個頭原來係用水泥黐上去(佢後生時爬過上去!! @o@!!)之後, 我先唔再驚. -___-;

Vampier

吸血鬼, 呢種傳說中嘅生物, 每個人對佢都有唔同嘅想法.
有人覺得恐怖. 因為傳說中吸血鬼凶殘, 好色, 被吸血嘅人會死, 變成傀儡, 又或者變成另一隻吸血鬼.
有人覺得無稽. 因為搵唔到科學化嘅證據. 而且, 如果好似傳說所講, 被吸血嘅人會變成另一隻吸血鬼. 呢個地球應該已經無唔係吸血鬼嘅生物存在.

有一個想法突然間喺我個腦裡面出現.

假如吸血鬼本身並唔嗜血, 一直到佢遇到佢真心愛戀嘅人, 吸血嘅欲望先會出現. 如果佢唔吸呢個人(唔會係其他人, 因為佢對其他人根本無興趣)嘅血, 想吸血嘅欲望會蠶食佢, 迫佢發狂. 而佢吸過呢個佢所愛嘅人嘅血之後, 只可以吸呢個人嘅血. 唔再吸血或者吸其他人/動物嘅血的話, 佢都會灰飛煙滅.

咁又會點呢?

佢愛嘅人唔一定會愛佢(隨時仲會係怕咗佢), 而壓抑不住嘅欲望會令佢失控.

會點呢?

愛與破滅.

一個淒美嘅吸血鬼故事...



總有一日, 我會寫佢出嚟!

英雄樹

即係木棉樹. 因為佢嘅樹幹生得好直, 似個正直嘅英雄, 所以有人叫佢英雄樹. 每年5至6月木棉嘅果都會爆開, 有d棉絮飄出嚟. 呢d棉絮, 以前有人執嚟整墨盒(寫毛筆字用果d, 唔係printer用果d). 依家唔駛用墨盒, d棉絮無咗實際用途, 但係都可以感受吓"雪飄飄"嘅感覺. 我自己覺得唔錯, 而且d樹生得好好地, 係幾好.

今朝睇報紙, 有個人寫信去投訴話d木棉絮會令佢敏感, 叫食環署處理咗d樹去!
處理咗d樹去?! 你想點呀? 因為你敏感所以就要斬晒d樹去呀? 如果我話我見到你, 令我覺得好過敏, 叫食環署處理咗你. 得唔得丫? 都黐線架! 日本, 加拿大每年都有好多人花粉症, 佢地帶個口罩就繼續出街過佢地嘅日常生活, 無叫當地政府處理咗d樹去. 因為佢地覺得d樹無錯, 無理由向d樹開刀.
香港人, 幾時先可以唔再只係諗用咩方法去改變周圍環境嚟遷就自己呢?

從前, 維多利亞港是水深港闊.
現在, 剩得一半,
將來, 變身成為

維多利亞明渠

請一同默哀一分鐘...

肉骨茶

自從9年前喺馬來西亞食過一次之後, 我就愛上肉骨茶. 返來之後, 試過好多地方(出嘅湯包), 但係都搵唔返果日晨咁早坐喺街邊大排檔食果d咁好味.
今日亞媽煲咗文西喺新加坡買返來的肉骨茶湯包. 雖然都係覺得唔夠馬來西亞果次d好味, 但係係之後食咁多次最好味的! :9~~
唔知點解, 我就係鍾意呢d藥材/香料/香草味(肉桂除外)重嘅野食.

其實我算唔算係一個鍾意攪事嘅人?

尋晚亞媽講咗佢搭巴士時嘅奇遇我聽.

佢遇到個言行好令人不安嘅司機(話佢坐緊果個位早幾日曾經有人跌咗個頭落嚟, 又不斷講好多語無倫次嘅野). 我亞媽當無事發生過, 但係俾我就隨時嚇到走唔切! 跟住我就打咗個email去巴士公司, 將呢件事doo咗上去.

巴士公司未有回覆(我都估佢無咁快), 但係我就俾我亞爸同亞媽話. 叫我唔好攪咁多野!! 佢地話果個人有問題, 其他人自然會port佢, 總之就係叫我唔好攪事.

我係攪事咩??!!

When Sh!t comes...

呢句係仍然返緊工時成日會講嘅說話. 會諗起係因為今日發生嘅事實在係好貼題.
今日陪亞媽去買餸, 等緊過馬路返屋企時天陰陰(剛剛落完一場大雨), 突然間覺得手臂好似俾水滴到, 一望至知, 原來係雀sh!t...
夜晚亞爸開機上網(佢最近熱中上網), 發現部機好唔妥, 除咗仲上到網之外其他software乜都唔work!! (中咗毒, 有隻熊貓會揸住3枝香對住你喊果種)攪咗幾個鐘, 部desktop入面d毒就應該清咗, 但係部notebook就仲未掂...
攪到半夜3點幾, 原本準備去訓, 點知就開始行雷閃電狂風暴雨(d雨係打橫落的!!) 掛住睇閃電落雨同d人起身收衫, 卒之依家清醒得滯...

電腦白黐

雖然我喺學校係讀電腦的(而且成績唔差). 但係我相信我絕對係個電腦白黐. 用咗一晚嘅時間去改個blog d字嘅顏色. 攪足成晚都唔掂, 亂"禁"一餐之後, 突然間, 得咗!! =___=;

又一個夢 (從舊blog搬來的 - 3)

前晚發了個夢.


在夢中我遇見一個跟18年前的電影"Labyrinth" 裡的David Bowie差不多裝扮的男人.


他帶我去到一塊灰色的沙石地. 在那裡一把紅色和一把黑色的直傘交叉插在地上. 他叫我把紅色直傘的手柄拔去. 幾秒後從紅色的傘中噴出了美麗的花火. 之後我把黑色直傘的手柄也拔去, 但是,


'什麼也沒有.' 我說.


'紅色是花火.黑色是"我"會出現.' 他說.


畫面一轉,


我們坐在一個類似教室的房間. 四周有很多人. 聽不清楚那些人在說什麼, 只聽到響亮的金屬敲擊聲. 他痛苦的抱著頭捲曲著身體. 我伸出手蓋住他的左耳, 並把他拉近, 讓他的右耳貼在我的胸口.


'他們會說難聽的話.' 他說著把我推開.


'別理他們.' 我再一次將他拉進懷裡.


下一瞬間,


是我瑟縮在他抱得緊緊的懷抱裡. 他哭著說了一些話, 而後


像縷煙一樣消失不見了.


我感到非常傷心, 跑到室外去, 只望見巨型的橙紅色的夕陽懸掛在路的盡頭.


再次去到灰色的沙石地, 紅色和黑色的直傘仍然是交叉著插在地上. 我憤怒地拔去黑色直傘的手柄. 良久, 什麼也沒有. 我把傘的手柄擲到地上,


'你這個混蛋還不快出來!?' 我大叫.


頭頂傳來了淺笑聲. 我抬頭一看, 他就坐在乾枯, 只剩枝椏的大樹的一枝支幹上.


畫面又再轉變,


他拖著我走上長長的階梯. 階級的盡頭有一間灰藍色的木屋. 在屋內有5,6個身穿白色禮服的男女, 他們由青年到老年也有.我們在這群人面前走過. 他們在微笑.


走進一個小房間, 他叫一個長得有點胖的嬸嬸給我找件合適的衣服. 那嬸嬸自豪地拿出了一件


白色的蕾絲洋裝.


他指著自己的領口說仍欠了些東西. 之後他拿了一條懸著一個長方形鍊墜的頸鍊出來, 放到我的手上.


'有你的頭髮的黑色和我的頭髮的黃色.' 他說.


畫面變成了我看著他抱著穿上了白色洋裝的我


'為了完成那件事, 你必需為我再死一次.' 他說.


然後, 在他懷抱裡的那個我


"嘭"


變成了一堆白色的羽毛飄散在空氣中.


夢醒前的最後一個畫面:


灰色的天, 灰色的沙石地, 紅色和黑色的直傘仍然是交叉著插在地上


嗯...不是作的...我是真的發了這樣的夢...

一個星期 (從舊blog搬來的 - 2)

已經無業咗一個星期, 日日訓足12個鐘...混混岳岳, 無所是事, 百無聊賴... -___-;

希Blog新開張 (從舊blog搬來的 - 1)

因為身在外太空, 正進行宇宙漫遊的Hay沒有好好的寫<希樂園>的網頁, 所以, 身在地星的希唯有遲遲鈍鈍地學人開了個blog. 會保持<希樂園>的傳統, 有的沒的,亂說一通.