今朝一早(其實唔算係好早, 10點零)亞妮斯打電話嚟叫醒我同亞媽睇佢同輝哥上電視. 原來佢地唔知點解(join咗電單車隊??)走去參加慶回歸車隊巡遊.
等咗個幾鐘卒之見到佢地喺個螢光幕嘅一邊"閃"過, 大半個螢光幕都係影住毛記果兩個做咗好多年都無人記得佢地係邊個嘅藝員. 亞媽因為閤著咗, 連果一"閃"都睇唔到...
夜晚放煙花, 我走咗去煮飯(用上次4妹用剩嘅Sake煮大蜆, 好美味!! :9~~)無睇到. 亞爸亞媽都話睇唔到有"中国人".
然後, 我發現一樣好奇怪嘅野, 就係點解香港每次放煙花, 都要播由台灣人作曲填詞, 台灣群星(勉強嚟計有一個周華健可以當係香港人)主唱嘅"東方之珠"嘅呢? 其實, 我由10幾年前第一次聽到呢隻歌時就覺得好奇怪, 你班台灣人做乜要"唱香港"呢? 定係呢首歌入面嘅"東方之珠"唔係指香港, 只不過我地呢d香港人一聽到呢4個字就將佢認定係指香港呢?
沒有留言:
發佈留言