竟有如此不可思議的人

今晚放學返屋企時搭巴士.
坐喺上層, 車門嗰邊嘅"窗口位".

坐"窗口位"嘅"指定動作", 就係--望街.

架巴士行吓行吓, 去到一個燈位, 要停綠公仔, 俾人過.
因為下個站重有好遠先到, 所以架巴士係喺"中線". 近行人路嘅"慢線"就冇車.

話明係"停綠公仔, 俾人過", 有人喺巴士前面過係好正常嘅事.
但係有3個女人唔知點解行到去"慢線"位置時就唔再行.
佢地擰轉身, 又指手劃腳, 又揮手. 都唔知佢地攪乜.
要叫個行得慢D嘅朋友行快D都可以喺行人路上面叫, 唔駛企喺馬路中心丫.

睇住佢地攪咗一排, 終於發現,

原來,

佢地係叫緊個

巴士司機

開門俾佢地上車!!!

咩人嚟架?!
就算搭的士都唔可以喺馬路心上落車啦!
何況係巴士?

個司機如果真係咁神智不清, 開門俾佢幾個上車, 唔只會俾人COMPLAIN, 隨時重會連飯碗都打爛埋...

唔知點解, 硬係覺得呢3個女人會四維同佢D親戚朋友, 三姑六婆講: 嗰個巴士佬幾衰呀! 架車明明係停喺度家嘛, 我地叫極佢都唔開門俾我地上喎! 衰得佢丫!