巴士亞姐X2

不時聽聞到嘅"巴士亞叔", "火車亞姐"之類嘅情況, 終於有機會現場睇戲一次.

已經係上個星期四嘅事.
夜晚放學之後, 一如往常, 搭巴士返屋企.
一切都好正常.
直到巴士過咗天后, 坐落車門後面個位嘅亞姐拎轉身, 同坐落車門後面第2個位嘅亞姐講,
亞姐1: 喂! 好囉喎! 你頂夠未呀?!
亞姐2: 我對腳係咁長架喇! 家陣唔俾人腳長呀?

2個亞姐你一句我一句, 鬧咗一陣就冇晒聲, 當在場嘅所有人以為"散場"時, 坐落車門後面第2個位嘅亞姐把聲突然間響起,
亞姐2: 坐我前面條八婆呀, 話唔俾我腳長呀!
亞姐1: (拎轉身)咩X事呀你! 八婆! 八婆! 八XX野呀!
亞姐2: 咩X野呀! 我同我老公講電話唔X得呀?!

於是"戰幕"再開, 2個亞姐仲用亞媽互相問候, 一時之間, 成車都係亞媽...
亞姐1仲走去搵司機先生, 話
亞姐1: 有人恐嚇我呀, 我依家好驚呀! 我要報警!

咁嘅情況之下, 司機先生唯有將巴士駛埋一邊, 等2個亞姐繼續用亞媽互擲同決定係咪要報警.

又一輪大吵大鬧之後, 終於佢地決定唔報警, 車又可以再開喇.

鬧吓鬧吓, 巴士去到太古, 停站, 2個亞姐一齊落車. 佢2個一落車, 有個亞婆即刻就講.
亞婆: 佢兩個一齊行, 唔知會唔會打交呢?

其實當時我好想攞部機出嚟錄低佢, 可以同親朋好友分享一吓, 但礙於我坐個位好當眼, 為免2個亞姐一齊調轉鎗頭, 用D亞媽嚟擲我, 所以只有乖乖睇戲囉...