請先撫心自問

尋日發生咗一單"警察開槍打死野人"嘅事件。
喺香港"警察開槍打死人"咁大件事，各大小傳媒當然好多野講。

我只係東一句西一句咁睇，唔係好知詳情。
加埋亞媽嘅精彩講故，大概知道：
1) 有人報警話一直住喺山邊嘅南亞裔"野人"可能有不軌；
2) 有騎警奉召到場，上山查問"可疑人物"；
3) "可疑人物"＝"野人"在被查問時情緒失控，持木凳追打騎警；
4) 騎警先後用胡椒噴霧及警棍自衛還擊，但均被打掉；
5) 有指目擊者錄影片段中騎警多次大叫："放低武器！唔好迫我開槍"；
6) 有指騎警當時已被迫至死角，無路可逃；
7) 騎警開了2槍，1槍射失另1槍射中"野人"頭部；
8) 騎警受傷送院治療，"野人"送院後不治身亡。

作為一個唔在場嘅人，莫講新聞通常只睇大標題嘅我，就算係將所有新聞"Lun"完又"Lun"嘅人都冇可能對當時嘅情況知得一清二楚。
所以當我睇到亞"途緊身"議員話：被人打咪走囉，做咩要開槍殺人?!(原文係由記者轉述，寫得十分客氣)時就好想問："途議員"如果你係騎警先生，你會點做呢？當時你已經噴晒成枝胡椒噴霧，警棍被人打跌，支援未到，再加被一個已經失去理性嘅人，攞住木凳追住你打到埋牆角。你會點做呢？

當然，我冇可能問到"途議員"(問到佢，佢都可以話："唔答假設性問題")，所以我就靠多年來睇埋唔少嘅"FBI調查報告"同美式電視劇作為參考，推斷出以下結論：
有受過專業訓練嘅人會喺冇其他可行辦法嘅情況下，用最少嘅子彈令對手失去行動能力(當然唔會擔保一定唔會死人)。
一個普通人冇受過專業訓練而又有槍喺手的話(雖然喺香港冇乜可能)，係會開槍開到手麻痺或者有人制止先會停(當然都係唔擔保會唔會死人，冇人話冇受過訓練一定射唔中)。

事不關已時要諗一諗："如果我係當事人"，之後先好發表"偉論"。
如果自己係當事人，更加要諗一諗："如果我係對方"，先好發砲攻擊("口誅筆伐"呀...)。

我成日提醒自己：
每個人都有一個限度。

所以對其他人有要求時，請先撫心自問：你自己又做得到嗎？