絲蘿非獨生, 願托喬木

李靖一開門, 門外嘅美貌紅衣女子就對佢講出呢句話: "絲蘿非獨生, 願托喬木."

可能已經冇乜人記得, 十幾廿年前無線播過一套叫"大運河"嘅時代劇. 係一個隋末群雄並起嘅故事.

其實我對呢套電視劇都冇幾多記憶, 只係成日都會記起呢一句對白.

當時教中文嘅MISS講, 紅拂女係一個非常前衛同時亦好含蓄嘅女性. 因為一個古代女性, 主動走去同男人私奔(仲要係"因為我鍾意你, 所以我要跟你走"!!), 點睇點計, 都係好前衛. 至於佢嘅含蓄之處, 就在呢句"絲蘿非獨生, 願托喬木."

"絲蘿"亦即係"菟絲子/ Dodder". 菟絲子科一年生寄生草本植物. 有小白花, 繞生在喬木樹幹上靠從喬木吸取樹液為生.

"絲蘿"無法獨自生存, 必需依靠喬木.

紅拂女用此比諭自己係一個柔弱女子, 需要托付李靖這樣穩重有用嘅男人. 係含蓄, 因為唔係畫公仔畫出腸, 講到明明白白:"我依家搵你同我私奔呀~!" 假若李靖係個"大懞佬"就唔明原來呢個才識兼備嘅美女嘅真心意.

不過, 呢D都只係古代先可以有嘅風雅.

現代社會, 一個女子, 莫說真係才識兼備, 不屑做"絲蘿", 就算本質係"絲蘿"都不可不扮喬木. "公一份婆一份"已經係好幸福囉!